ავტორი: ირაკლი მანაგაძე

დეკლარაციაში ბრუნვა დღგ-ისგან ჩათვლის უფლებით გათავისუფლებულად წერია — ტუროპერატორის ან ტურისტული საწარმოს შეღავათით. შემოწმებისას ერთი კითხვა ისმის: სრულდება თუ არა შეღავათის პირობა და რით ჩანს ეს? თუ პირობა ვერ დადასტურდა, გათავისუფლებული ბრუნვა დასაბეგრი ხდება; ამ ოთხ დავაში დარიცხვას ჯარიმაც და საურავიც ახლდა.

ქვემოთ ოთხ დავას განვიხილავთ. თითოეული ჯაჭვად შევამოწმეთ — შემოსავლების სამსახურის ბრძანებიდან ფინანსთა სამინისტროსთან არსებული დავების განხილვის საბჭოს გადაწყვეტილებამდე, სადაც ეს ეტაპი უკვე არსებობს; სასამართლო ეტაპი არცერთ ჯაჭვში არ ჩანს. ორი დავა ტუროპერატორის შეღავათს ეხება (172-ე მუხლის მე-4 ნაწილის „პ“ ქვეპუნქტი), ორი — ტურისტული საწარმოს მიერ ბინების მიწოდებას (იმავე ნაწილის „ქ“ ქვეპუნქტი). შედეგი ერთნაირი არ არის: ტუროპერატორის ორივე საჩივარი არ დაკმაყოფილდა (ერთში — ჯერ მხოლოდ პირველ ეტაპზე). ტურისტული საწარმოს ორივე საქმეში აუდიტს გადამხდელის მტკიცებულებების შესწავლა დაევალა: ერთში ბოლოს საბჭომ დარჩენილ ნაწილზე საჩივარი არ დააკმაყოფილა, მეორეში შედეგი ჯერ უცნობია.

რას ამბობს ნორმა

სსკ 172-ე მუხლის მე-4 ნაწილის „პ“ ქვეპუნქტით დღგ-ისგან ჩათვლის უფლებით გათავისუფლებულია „ტუროპერატორის მიერ საქართველოს ტერიტორიაზე უცხოელი ტურისტის ორგანიზებული შემოყვანა და მისთვის საქართველოს ტერიტორიაზე ტურისტული პროდუქტის მიწოდება“.