საგადასახადო სამართალდარღვევა - ელიტ აუდიტი — აუდიტორული, საბუღალტრო და საგადასახადო მომსახურება თბილისში | Eaudit.ge

სსკ 269.7 — რატომ ათავისუფლებს ჯარიმისგან ერთს და მეორეს არა

irakli — Wed, 19 Aug 2026 10:01:58 +0400

269.7 საგადასახადო დავებში ყველაზე ხშირად მოთხოვნილი შეღავათია — და ყველაზე ხშირად უარყოფილიც. 587 გამოქვეყნებული დავის ანალიზმა აჩვენა, სად გადის ზუსტი ზღვარი „საპატიებელ შეცდომასა“ და „სისტემურ უწესრიგობას“ შორის — და რომელი პროცედურული დეტალი ღირს ათასობით ლარი.

რა არის საგადასახადო სანქცია?

irakli — Wed, 12 Jul 2023 14:06:31 +0400

საგადასახადო სანქცია არის პასუხისმგებლობის ზომა ჩადენილი საგადასახადო სამართალდარღვევისათვის. საგადასახადო სანქცია გამოიყენება გაფრთხილების, საურავის, ფულადი ჯარიმის, სამართალდარღვევის საქონლის ან/და სატრანსპორტო საშუალების უსასყიდლოდ ჩამორთმევის სახით, ამ კოდექსით გათვალისწინებულ შემთხვევებში.

რა შემთხვევაშია ვალდებული გადასახადის გადამხდელი, გადაიხადოს საურავი ?

irakli — Wed, 12 Jul 2023 14:05:57 +0400

თუ კუთვნილი გადასახადის თანხა გადამხდელის მიერ საგადასახადო კანონმდებლობით დადგენილ ვადაში არ არის გადახდილი, პირი ვალდებულია გადაიხადოს შესაბამისი საურავი.

როგორ ხდება საურავის დარიცხვა ?

irakli — Wed, 12 Jul 2023 14:05:23 +0400

საურავი ერიცხება საგადასახადო დავალიანების ძირ თანხას, გადასახადის გადახდის ვადის ამოწურვის დღის მომდევნო დღიდან, თითოეული ვადაგადაცილებული დღისათვის 0,05 პროცენტის ოდენობით. გადასახადის გადახდის ვადის გადაცილების შემთხვევაში გადასახადის გადახდის დღეც ითვლება ვადაგადაცილებულ დღედ. საგადასახადო სანქციას საურავი არ ერიცხება.

დაერიცხება თუ არა გადასახადის გადამხდელს საურავი, თუ მან კანონმდებლობით დადგენილ ვადაში არ გადაიხადა კუთვნილი გადასახადი, ხოლო სხვა გადასახადებში გააჩნია ამავე მოცულობის ზედმეტად გადახდილი თანხები?

irakli — Wed, 12 Jul 2023 14:04:43 +0400

ამ შემთხვევაში გადასახადის გადამხდელს არ დაერიცხება საურავი, ვინაიდან საურავი ერიცხება საგადასახადო დავალიანების თანხას, რომელიც გამოიანგარიშება ყველა გადასახადის მიხედვით და იგი არის სხვაობა პირის შეუსრულებელ საგადასახადო ვალდებულებებსა და მის მიერ ზედმეტად გადახდილი გადასახადების ჯამს შორის.

რა დოკუმენტი დგება საგადასახადო სამართალდარღვევის ფაქტის გამოვლენისას?

irakli — Wed, 12 Jul 2023 14:04:12 +0400

საგადასახადო სამართალდარღვევის გამოვლენისას საგადასახადო ორგანოს უფლებამოსილი პირი ადგენს საგადასახადო სამართალდარღვევის ოქმს, გარდა იმ შემთხვევისა, როდესაც სამართალდარღვევა დაფიქსირებულია საგადასახადო შემოწმების აქტში. საგადასახადო სამართალდარღვევის ოქმის შედგენაზე უფლებამოსილი პირი სამართალდარღვევის ადგილზე განიხილავს საგადასახადო სამართალდარღვევის საქმეს და სამართალდამრღვევ პირს ადგილზევე უფარდებს საგადასახადო სანქციას. ამ შემთხვევაში პირს შესაბამისი პასუხისმგებლობა დაეკისრება საგადასახადო სამართალდარღვევის ოქმის საფუძველზე, რომელიც ითვლება საგადასახადო მოთხოვნად. საგადასახადო ორგანოს უფლებამოსილ პირს უფლება აქვს, საქართველოს ფინანსთა მინისტრის მიერ დადგენილი წესით და დადგენილ შემთხვევებში, საგადასახადო სამართალდარღვევის ოქმის შედგენის გარეშე, პირს განუსაზღვროს ვადა საგადასახადო სამართალდარღვევის აღმოსაფხვრელად და შეადგინოს „საგადასახადო სამართალდარღვევის აღმოფხვრის ვადის განსაზღვრის აქტი“. აღნიშნული ვადის მოქმედების პერიოდში პირს იმავე სამართალდარღვევისათვის პასუხისმგებლობა არ დაეკისრება.

რა ვადაშია შესაძლებელი საგადასახადო სამართალდარღვევის ოქმის გასაჩივრება?

irakli — Wed, 12 Jul 2023 14:00:56 +0400

პირს უფლება აქვს, გაასაჩივროს საგადასახადო სამართალდარღვევის ოქმი მისი ჩაბარებიდან 30 დღის ვადაში.

რა შემთხვევაში ითვლება საგადასახადო სამართალდარღვევა განმეორებით ჩადენილად?

irakli — Wed, 12 Jul 2023 14:00:18 +0400

საგადასახადო სამართალდარღვევა განმეორებით ჩადენილად ჩაითვლება, თუ იგი ჩადენილია წინა სამართალდარღვევის გამოვლენიდან 12 თვის განმავლობაში, ხოლო, რაც შეეხება საკონტროლო-სალარო აპარატების გამოყენების წესების დარღვევასთან დაკავშირებულ სამართალდარღვევებს, აღნიშნული სამართალდარღვევები განმეორებით ჩადენილად არ ჩაითვლება, თუ ჩადენილია ერთსა და იმავე დღეს, ტერიტორიულად განცალკევებულ ობიექტებზე.

რა შემთხვევაშია შესაძლებელი გადასახადის გადამხდელი გათავისუფლდეს საგადასახადო სანქციისაგან?

irakli — Wed, 12 Jul 2023 13:59:46 +0400

საგადასახადო ორგანოს/დავის განმხილველ ორგანოს ან სასამართლოს უფლება აქვს საგადასახადო სანქციისაგან გაათავისუფლოს კეთილსინდისიერი გადამხდელი, თუ სამართალდარღვევა გამოწვეული იყო გადასახადის გადამხდელის შეცდომით/არცოდნით. გარდა ამისა, გადასახადის გადამხდელს საგადასახადო შემოწმების შედეგად დარიცხული ჯარიმების თანხების 50 პროცენტი გაუუქმდება, თუ გადასახადის გადამხდელს ამ საგადასახადო შემოწმების შედეგად გამოცემული საგადასახადო მოთხოვნის ჩაბარებიდან 30 დღის ვადაში ბიუჯეტში სრულად აქვს გადახდილი საგადასახადო მოთხოვნით გათვალისწინებული გადასახადების, აგრეთვე ჯარიმების 50 პროცენტის ტოლფასი თანხა და პირის მიერ ამავე ვადაში აღიარებულია შესაბამისი საგადასახადო მოთხოვნით გათვალისწინებული თანხა.

რა შემთხვევაშია შესაძლებელი პირის მიმართ საგადასახადო სანქციის სახით გაფრთხილების გამოყენება?

irakli — Wed, 12 Jul 2023 13:58:56 +0400

ფულადი ჯარიმის ნაცვლად , საგადასახადო სანქციის სახით გაფრთხილება შესაძლებელია გამოყენებულ იქნეს სსკ-ის 281-ე მუხლით, 286-ე მუხლის პირველი და მე-11 ნაწილებითა და 291-ე მუხლით გათვალისწინებული საგადასახადო სამართალდარღვევებისათვის (გარდა განმეორებით ჩადენილი ქმედებისა).